प्रेमको भाव हृदय माझ उत्पन्न भै गयाे
संसार कस्तो अचम्म लाग्दो मनमा के भयो ।
भेटेकाे छैन देखेकाे छैन प्रेयसी कदापी
मनको भाव कसरी आयो मुहार नदेखी ।।
झुल्केकाे घाम मधुरो लाली पाेतियो धरामा
परेकाे छैन कसरी भनुँ प्रेमको करमा ।
लाग्दछ रम्य जुनेली रात रंगिन दुनियाँ
सुवास मीठाे सामिप्य आश आभाष मनमा ।।
देखियो रुप झलक्क अाज बिहानी घाममा
अप्सरा माथ गर्थिन उनी उन्मत्त पारामा ।
माेहनी रुप उज्ज्वल तेज निर्मल याैवन
सकूँला राख्न हृदय माझ स्याहारी जोबन ।।
प्रार्थना गरें अर्पिएँ फूल बाहुमा समाती
मुसुक्क हाँसी मधुर बाणी क्यै छैन आपत्ती ।
रमेर गएँ समिप अलि मसक्क मस्किएँ
सपनी रैछ नयन खुले झसंग झस्किएँ ।।
No comments:
Post a Comment